اسمعوا عمنا بيرم التونسي بيقول إيه عن المنبوذين المصريين

بسم الله الرحمن الرحيم
السلام عليكم ورحمة الله وبركاته

فكرت أبدأ أولي موضوعات بلوجر المنبوذين بقصيدة قالها عمنا بيرم التونسي من زمان بعنوان "المنبوذين" لما اشتهرت حملة غاندى فى الدفاع عن منبوذى الهند .. وده لأن البلوجر فكرته مستوحاه من القصيدة دي .. عمنا بيرم قال في قصيدتة دي إن المنبوذين المصريين أكثر بؤساً من المنبوذين الهنود، وشغل قدام عيوننا شريط سينمائي بنشوف فيه مشاهد متتابعة لقوافل التعساء من الفئات المصرية فى ذلك الزمن، والناتجة عن التخريب غير الإنسانى للمجتمع المصرى من قبل الاستعمار الإنجليزي، والوضع مختلفش دلوقتي عن زمان إلا في حاجة واحدة بس .. إن الاستعمار كان السبب .. لكن لدوقتي اللصوص هما السبب أو السادة بما إن مجتمعنا أصبح مجتمع سادة وعبيد زي ما هنبين في موضوعاتنا الجاية إن شاء الله

والمنبوذين للي ميعرفش هما فئه مهمشة الكل بيحتقرها منبوذة من المجتمع، بتشوف جميع أنواع الذل والهوان من السادة أصحاب السلطة، وهنتكلم عنها بالتفصيل في موضوعات الجاية إن شاء الله وهنشوف إن المنبوذين المصريين خاصة في زمنا ده حالهم أسوأ من منبوذي الهند زمان

قصيدة عمنا بيرم كأنه كتبها النهاردة بس .. فيها واقع مصر حالياً كأن التاريخ بيعيد نفسة .. فكرت أبدأ بيها البلوجر ده لأن فكرته قايمه على القصيدة دي .. غيرت بس كلمة واحده في البيت الأخير وهي كلمة الإنجليز وحطيتها بين قوسين (اللصوص) وبكده تبقي القصيدة مكتوبة دلوقتي .. واسيبكم بقي تسمعوا وتحسوا كلام عمنا بيرم التونسي وشوفوا كان بيقول إيه

يا منبوذين الهند كفوا دموعكم

دى مصر فيها المنبوذين ملايين

من منبوذين حافيين يلموا سبارس

ومنبوذين ماسحين جزم دايرين

ومنبوذين شبان معاهم شهايد

حرم عليهم يدخلوا الدواوين

ومنبوذين.. نسوان.. وظابط مباحث

داير وراهم من كمين لكمين

ومنبوذين ف البيت عشاهم فلافل

ف العيد .. وأيام السنة جايعين

يا غاندى يكفى صوم تعالى بلدنا

شوف اللى فيها من زمان صايمين

بلد دهبها انشال ودهبان حالها

ولسه فيها الإنجليز (اللصوص) قاعدين